الصفحة الرئيسيةالفصل الحادى عشر
زيارة ناقصة
زيارة ناقصة!! L
ناقصة كتير أوى ماكنش نفسي تبقي كده خالص
عارف ليه؟؟!!!
أول مرة الجمعة اللى فاتت لما كنت فى الأمن عشان ماكنتش طلعت مع الزيارات وكده لابسين اللبس الميرى الأفارول والبنطلون الازرق والبيادة غير لما تكون فى الزيارة بتلبس الترنج وبنطلونه وتطلع عشان تقابل اللى جايلك.
الجمعة اللى فاتت دى كانت ناقصة أنى اشوف ابويا مثلا او ستى او حد من اخواتى لكن مكنش زعلت اوى كان مجرد زعل بسيط وعدت عادى يومها كان تعب شوية بس عادى .
لكن النهارده طبعا التلفون كان معايا من اول امبارح كنت قولت لابويا ييجي وكده واتفقت معاه يجيب اكل وكده.
جه النهارده بقي بس حسيت ان فى حاجة ناقصة بغض النظر عن الاكل والقعدة مع ابويا وعادل وصفوت اخواتى واتكلمنا واطمنت على ستى والجماعة فى البيت بس كان شعور عادى كان نفسي كده يبقي ليا حد يبدلنى شعور حلو أحس بيه أول ما اكلمه
يقلق عليا !!
غيابي عنه ما يبقاش عادى
اكيد فى ناس جايز تكون فكراك وهما واحشينك جدا وانت كذلك بالنسبالك.
ياريت الواحد كان خاطب ولا حاجة وليه حد يهتم بيه ويحس بيه ويبقي قدامه ما يستغناش عنه
شعور حلو اوى ما يتوصفش
ليه وقت ويكون ان شا الله
بس النهارده كان هو ده الشئ الناقص اللى انت بتحبه وكان نفسك تشوفه او تسمع صوته حتىL
ماكنتش أظن ان قلب الواحد هيتعلق اوى كده
بس سبحان الله القلوب بين اصبعين من اصابع الرحمن يقلبه كيف يشاء.
الواحد كان يشوف كل الناس اللى موجودة فى الزيارة اللى مع خطيبته او اخته او مراته حتى عشان ده بقي نصك التانى وكده
والواحد برضه يتمنى حد يبادله شعور الحب والاحترام والود .
الزيارة كانت النهارده من 8 الى 2 بعد لضهر
طبعا الناس كانت جاهزة للتكدير زى الاسبوع اللى فات لما وقفنا ثابت مدة ساعة ومص كاملة من غير حركة طبعا رجالة وقدها حمدلله ودت على خير.
لكن الحاجة اللى مش حلوة النهارده برضه بعد كل ده والاكل والشرب وكل حاجة ملكى كان علينا احنا تنضيف الوساخة والزبالة بتاعة المركز
مكان الزيارة بلا استثناء طبعا
وكان علينا شويش محترم حمدلله مكدرش حد فينا
الشويش كان اسمه محمود لسه ماعرفش هو منين لكن محترم جدا وكان مبسوط جدا مننا عشان انضبطنا فى الطابور
واخدنا التمام مظبوط كمان وقعد يحكيلنا ويكلمنا عنه شوية وعن اللى كان بيحصله فى مركز التدريب والوحدة الاساسية كمان J .
هو صف ظابط بس محترم جدا
كنا واخدين فكرة عن اى صف ظابط انه وحش لكن احيانا بيشد عليك عشان مصلحتك اولا وخايف عليك
بغض النظر عن كمية الوساطة اللى فى مركز التدريب البحرى ده.
ده ممكن يكون العميد ذات نفسه متعين بواسطة مش بعيدة والله بعد كمية الوسايط اللى شوفناها فى مركز التدريب حاجة رهيبة بجد انا بهزر طبعا محدش ياخد على كلامى ده عشان فى عصافير كتيرة فى السرية.
وحاجة مش حلوة بصراحة لان ناس كتيرة بتنظلم
بالنسبة للنظافة اللى وضحت للواحد كمية العفانة والزبالة اللى الشعب فيها فعلا شئ لايوصف.
قعدنا ييجي نص ساعة او اكتر ننضف فى مكان الزيارة
وحمدلله خلصت وعدت على خير وكالعادة والروتين الغدا كان ع الساعة 3 تقريبا او اكتر والعشا فى معاده فى 7 او 6ونص تقريبا .
طبعا مش كل الناس أكلت فى الميس لانها ملئت الكرش كله النهارده ومش محتاجه غير مثلا قزازة بيبسي او حاجة ساقعة عصير كده يعنى تحبس بيه الاكل.
حمدلله على كل حال
دايما فى وسط انشغالاتك دى كحمكدار بقي وكده بتشتغل كتير واحيانا بتنشغل عن ناس بس بكرة هنظبطها شوية برضه.
ناس كتيرة وحشتنى جدا ربنا يحفظها ويبارك فيها ويبلغها سلامى من كل قلبي.
وانا فى مركز التدريب بتاعى ده حتى وانا بكلم عمتى صباح اول امبارح حسيت قد ايه الناس اللى بحبها غالية اوى عليا عشان كده وانا بقولها ماتنسيش تسلميلى على حد بحبه جدا فعلا.
وقلبي بيعزه فوق ماتتخيل
حاجة كده كل كلمات الشعر الرومانسية اللى اتكتبت ماتكفيش فى وصف حاجة حلوة فيه.
ربنا يبارك فيهم برضه ويبلغهم سلامى زى ماقولت لعمتى ان كلامى ليها وصية ولازم تعملها.
يارب تعمل كده وماتكسلش او تنسي كلامى ده ويارب لما انزل اجازتى اشوفهم واطمن عليهم يارب استجب دعائي.
يارب ولا تخيب ظنى ورجائي.
انت عالم بحالى غنى عن سؤالى تعلم سري وجهرى
لو كل اجازة كده يبقي ناقصة برضه L L
يارب ماتكرر تانى كده واجبر كسري ده
#السرية_الاولى
ليست هناك تعليقات:
إرسال تعليق