الصفحة الرئيسيةالفصل الخامس
الصديق
كل يوم أحلى من التانى بسبب الناس اللى معايا واللى بعرفها بجد شئ لا يوصف لما تحس بحب الناس لك الحمدللهيارب كما ينبغى لجلال وجهك وعظيم سلطانك .وفعلا لما تحس انكم جسد واحد وخايفين على بعض .انا كحكمدار سرية 1 فصيلة 4 كان لازم ابقي قريب لكل الناس واتعامل معاهم كويس جدا
كمان وتبقي علاقتنا طيبة مع بعض دايما لحد حتى بعد ما نخلص فترة التدريب دى.وجه دلوقتى معاد النوم وكالعادة لازم تنام فى معادك عشان تصحي بدرى فى معادك وتحلق فى معادك برضه . وبكرة تقريبا هنتعلم النشان ببندقية الرش.ربنا يسهل ! Jمن ضمن الصحاب اللى اتعرفت عليهم جديد من الناس اللى بتحب الشعر وكده كان اسمه فتحى.حتى ملانى قصيدة ما تزعليش اللى كانت هتخلينى أعيط فعلا لأنها فكرتنى بحاجات كتيرة اوى L وزعلتنى جدا بس برجع أقول لعله خير وربنا يقدملنا اللى فيه الخير يارب .
وطلع بيحب الشعر جدا وقاللى كمان على عبدالرحمن الابنودى وانه بيحبه جدا وليه قصيدة جامده جدا هيجيبهم على اسطوانة لما ننزل أجازة.اسطوانة فيها الحاجات دى منه fathy ozil على الفيسبوك.
وفى ناس كتيرة من الفصيلة برضه مؤدبة جدا شريعة وقانون وكمان مرتبة على الدفعة كان اسمه أحمد بيقول انه الرابع على الكلية.
وفى كمان اللى كان جمبي على اليمين عماد رقم 185 برنس دماغ عالية اوى كلية اداب قسم اثار.
من اسكندرية العجمى الناس الطيبة المحترمة جدا.
فى ناس كتيرة لسه هنكمل عنها بس بكرة لانى تعبت جدا صراحة ونفسي أنام.####
تانى وم 2-2-2014 بسم الله الرحمن الرحيم النهارده يعتبر كان عليا خدمة العنبر صحيت الساعة 4ونص بدرى اوى عشان أصحي الناس للجمع قدام السرية الساعة 5ونص صباحا.
باقي اليوم مش هتكلم عنه كتير لانه حمدلله كان مريح وما كنش فيه تمارين كتيرة زى أول يوم وتثبيته يوم الجمعة كانت تثبيتة ساعة ونص طلع عنيا فى اليوم ده بصراحةمع انى كنت فى التأمين بره البوابة.
بس اتبهدلت بهدلة كبيرة والله يومها تعبت جدا بس اتصلت بالجماعة واطمنت عليهم وقولتلهم ييجوا زيارة يوم الجمعة الجاية ويجيبوا أكل معاهم لأن أكل البيت وحشنى بصراحة عشان أكل الجيش بتاكله من هنا وسبحان الله تلاقى بطنك وقفت فجأة وتنسي الحمام بقي بعدها علطول.
تخيل كده لما تدخل سرية ماتدخلش الحمام لمدة 3 أيام LL بقي اكبر امساك شفته فى حياتى.
اه والله فعلا فى ناس نسيت اساسا تدخل الحمام من ساعة ما جيتJJ.
المهم جالنا شويش النهارده اسمه أحمد غزال بس حمدلله كان كويس معانا وطول ما السرية محترمة مع الصول بتبقي تمام .
احنا حمدلله الصول سمير كان مظبطتنا وكله تمام بسبب احنا محترمين وربنا يديم علينا ده عشان لو زعل هيكدرنا كلنا .
الشويش/أحمد غزال ماعملش أى حاجة غير شوية تمامات وفى الاخر انصراف وحمدلله دخلنا العنبر بتاعنا ومش قادر اتحرك وقعدنا نهزر ونضحك وننكت وكده والناس حمدلله كلنا مع بعضنا وبالمناسبة كمان واحد صاحبنا اسمه أحمد من البحيرة ايتاى تقريبا كان بيقول نكتة وضحكنا كتير جدا بس نكتة بصراحة بييييييييييييييييييض خالص خالص.
المهم ان احنا ضحكنا اوى برضه.الفصيلة بتاعتى عايزة تتظبط شوية وتتكدر لأنها سايبة خالص والله وبيهزروا كتير جدا للأسف.
وانا مش عايز ازعل حد ولا اجى على حد منهم عشان كلنا زى بعض ومع بعض. J
بس برضه أخدت كام رقم كده من الفصيلة عشان ينضبطوا شوية. الواحد كل يوم كنت بعرف ناس جديدة انا ناوى اعمل قايمة كده طويلة بأسماء الناس دى حبايبى وكلهم بنتعرف على بعض ونحترم بعض ونخاف على بعض.
من الناس اللى عرفتها كان رقم 175 بجد شئ لايوصف وقمة الاخلاق والادب والهدوء واسمه محمد من كفر الشيخ مطوبس تقريبا.
قمة الانضباط والالتزام وماشاء الله عليه سمة الادب والوقار وتحس ان قلبه أبيض وطيب وتحس انه انسان نقى كده مش شايل هموم الدنيا على كتفه حاسس انه مش محتاج غير ان اللى قدامه يقدره ويحبه ويخاف عليه بس .
#السرية_الاولى
وحوش...وحوش...وحوش
ليست هناك تعليقات:
إرسال تعليق