معلومات هامة لمن يبحث عن فرص عمل بالخارج مهم جدا

معلومات هامة لمن يبحث عن فرص عمل بالخارج

نصائح عامة لمن يبحث عن فرص عمل بالخارج

معلومة عن السفر :: ((1))

...

المفروض ان مفيش حاجة اسمها فلوس بتدفعها للمكتب او تمن العقد او كدة عشان المفروض الشركة الخليجية بتدفع اتعاب للمكتب مقابل توفير العمالة - لكن المكاتب اللى عندنا بتبلطج عالناس وبتاخد منهم اتاوة سعات بتبقى فى المعقول وسعات بتبقى مبالغ فيها - عالعموم فيه نسبة معترف بيها هى 2.5% من قيمة العقد.

معلومة عن السفر :: ((2))

الحاجة الغتتة ان الشركات الغير محترمة من بعد الثورة بقت بتصطاد فى المية العكرة وبقت بتنزل تقول مرتبات ضعيفة جدا لا تتناسب مع المعيشة فى الخليج يادوب تبقى عايش مش مسافر عشان تعمل فلوس - للاسف ده واقع وظروفنا وصلتنا لكدة بس حاولوا تماينوا الامور يعنى مترخصش نفسك انك تسافر تشحت ولو المرتب معقول تقدر توفر منه حاجة معقولة تتناسب معاك ممكن تمشى الامور

معلومة عن السفر :: ((3))

مهم جدا لما يجيلك عرض تحاول تتواصل مع اى حد ثقة بالنسبة ليك عايش فى نفس مدينة الشركة وتساله عن تفاصيل المعيشة فى المدينة دى من حيث اسعار المواصلات وايجارات المسكن وتكاليف المكالمات والنت وباقى التكاليف المعيشية لان كل مدينة فى الخليج ليها استايل مختلف ففيه مرتبات ممكن تبقى تحفة فى مدينة زى القصيم ويبقى نفس المرتب زبالة فى مدينة زى جدة

معلومة عن السفر :: ((4))

اعرف ان السفر دايما بيفضل زى الادمان وهتسافر كبير هتفضل طول عمرك كبير وهتسافر صغير هتفضل طول عمرك صغير فمتحاولش تسافر على حاجة تعبانة وتقول مؤقتا لان ممكن مؤقتا دى تضيع فيها سنتين من حياتك اللى هو تمن العقد

معلومة عن السفر :: ((5))

محدش يضحك عليك بمرتب تعبان لمجرد تبقى مقيم فى مكة او المدينة او جدة ويقولك هتبقى جنب الحرم وتلاقيك بتاخد نص مرتب زميلك اللى فى الرياض - الموضوع مش بيتقاس كدة فيه ناس بينهم وبين الحرم مش بيعملوا عمرة الا كل سنة مرة ويمكن محجوش وبقالهم عشرين سنة فى جدة وفيه ناس فى اماكن بعيدة تلاقيهم كل اسبوعين رايحين - هذه نكرة وهذه نكرة

معلومة عن السفر :: ((6))

الراتب فى الخليج وخاصة السعودية بيتحسب كدة للمتزوجين ,,, راتب اساسى + بدل مواصلات 10% او توفير سيارة + بدل سكن 3 شهور من الراتب الاساسى + تذكرة طيران سنوية لك وللزوجة + تامين طبى لك وللزوجة - ده اقل حاجة عشان تعيش عيشة ادمية

معلومة عن السفر :: ((7))

لما حد يقولك مثلا مرتب 2000 ريال متحولوش مصرى وتبدا تحسب مصاريفك - لاء احسب عالريال وشوف هتصرف كام على حسب المعلومات اللى هتعرفها وبعدين الباقى حوله بالجنيه

معلومة عن السفر :: ((8))

اوعى الراجل يضحك عليك ويعرض عليك مرتب ضعيف مثلا الف ريال ويقولك فيه 10 بره ممكن ياخدوا المرتب ده - مش معنى ان فيه 10 بيبعوا نفسهم انك تبيع نفسك كمان

معلومة عن السفر :: ((9))

متتعشمش فى حد اوى فى السفر - لما تسافر هتتصدم كتير وهتلاقى ناس معندهمش لا قلب ولا دم

معلومة عن السفر :: ((10))

يقولك راتب 1500 مثلا وفى اضافى 3 ساعات فى اليوم .. ملكش دعوة بالكلام ده وخليك بالرقم اللى هيتكتب فى العقد .. ممكن تيجي على مشروع مدته 6 شهور وبعد ما يخلص هتلاقى نفسك بالراتب اللى طلعة عليه وكل عام وانتم بخير

معلومة عن السفر :: ((11))

متتوقعش انك هتسافر وانت صغير تاخد مرتب خلال سنوات قليلة تجيب شقة تمليك وعربية وتجهزها وتتجوز ومثلا يبقى عندك 35 سنة معاك فلوس كتيرة تفتح مشروع (دى فرص لا تتعدى 5% من اللى بيسافروا)

معلومة عن السفر :: ((12))

طور نفسك فى كل البرامج التى تخص مجال تخصصك لان ليها تأثير على فرصة عملك فى الخارج وبتزود خبرتك

 المصدر 

موقع الفيسبوك جروب هندسة مدنى وخبرات